Больш за 395 тыс. дзяцей адпачылі ў летніх лагерах у Беларусі

У Беларусі гэтым летам у лагерах адпачылі больш за 395 тыс. дзяцей. Аб гэтым у прэс-цэнтры БЕЛТА паведаміў намеснік дырэктара Рэспубліканскага цэнтра па аздараўленні і санаторна-курортным лячэнні насельніцтва Аляксандр Цай.

Паводле слоў намесніка дырэктара, у гэтым годзе больш за 395 тыс. дзяцей адпачылі ў выхаваўча-аздараўленчых і спартыўна-аздараўленчых лагерах, што на 6 тыс. дзяцей больш, чым планавалася. "З іх 158,5 тыс. дзяцей адпачылі ў лагерах з кругласутачным знаходжаннем, 236,5 тыс. дзяцей - у лагерах з дзённым знаходжаннем. Акцэнт у гэтым сезоне быў зроблены на загараднае аздараўленне дзяцей у стацыянарных лагерах. У нас гэта атрымалася, у лагерах з кругласутачным знаходжаннем гэтым летам прайшлі аздараўленне больш за 139 тыс. дзяцей, гэта на 12 тыс. дзяцей больш, чым у мінулым годзе. Гэта вельмі важна, таму што менавіта ў такіх лагерах можна дасягнуць максімальнай аздараўленчай эфектыўнасці", - расказаў Аляксандр Цай.

Ён падкрэсліў, што павышаная ўвага, як і папярэднія гады, удзялялася ахопу аздараўленнем дзяцей-сірот і дзяцей, якія засталіся без апекі бацькоў, а таксама дзяцей-інвалідаў. Адпачылі ў лагерах амаль 11,9 тыс. дзяцей-сірот і дзяцей, якія засталіся без апекі бацькоў. Таксама каля 6,7 тыс. дзяцей-інвалідаў прайшлі аздараўленне ў лагерах усіх тыпаў, гэта фактычна на 1 тыс. чалавек больш, чым мінулым летам.

"На гэтыя мэты з рэспубліканскага бюджэту было выдзелена больш за Br73 млн, з якіх Br72 млн накіравана на патанненне кошту пуцёвак у лагеры, Br800 тыс. - на набыццё бясплатных пуцёвак для льготных катэгорый дзяцей і больш за Br600 тыс. - на падрыхтоўку стацыянарных лагераў сезоннага функцыянавання да работы ў летні перыяд. Акрамя таго, значна было павялічана фінансаванне развіцця інфраструктуры дзіцячага летняга адпачынку і аздараўлення абласнымі і Мінскім гарадскім выканаўчымі камітэтамі, а таксама са сродкаў рэспубліканскага бюджэту і са сродкаў уласнікаў. У бягучым годзе на ўмацаванне матэрыяльна-тэхнічнай базы стацыянарных загарадных лагераў было выдзелена больш за Br38,5 млн, гэта на 22 працэнты больш чым у мінулым годзе. Пры гэтым Br24,7 млн выдзелілі ўласнікі, мясцовыя бюджэты - Br11,2 млн, Br1,6 млн былі выдзелены са сродкаў прафсаюзнай, спонсарскай, гуманітарнай дапамогі, Br621 тыс. - са сродкаў рэспубліканскага бюджэту і амаль Br80 тыс. - са сродкаў, заробленых пры правядзенні мясцовых суботнікаў", - праінфармаваў намеснік дырэктара цэнтра.

БелТА