Падатковыя льготы, падача дэкларацый у электроннай форме: у МПЗ расказалі пра навацыі

Што змяняецца ў Беларусі адносна падатковых ільгот і спосабу падачы дэкларацый, расказала намеснік міністра па падатках і зборах Святлана Яськова ў час пасяджэння Аб'яднанага клуба дырэктараў "Заўтра пачынаецца сёння: асноўныя трэнды і арыенціры для бізнесу", перадае карэспандэнт БЕЛТА.

"Міністэрства па падатках і зборах праводзіць палітыку, накіраваную на дыстанцыйнае ўзаемадзеянне з плацельшчыкам. Мы паступова пераводзім усе катэгорыі плацельшчыкаў на прадстаўленне падатковай справаздачнасці ў электронным выглядзе. У нас засталося маленькае кола суб'ектаў, якія могуць дэклараваць свае абавязацельствы ў пісьмовай форме. Гэта некамерцыйныя арганізацыі, якія не ажыццяўляюць прадпрымальніцкую дзейнасць. Такія арганізацыі абавязаны прадстаўляць звесткі аб даходах фізічных асоб, аб налічаных сумах падаткаў, аб ільготах. Ім быў прадстаўлены адаптацыйны перыяд у 2024 годзе, і ён распаўсюджваецца яшчэ на 2025-ы. Але з 2026 года некамерцыйныя арганізацыі павінны будуць таксама атрымаць электронны лічбавы подпіс і прадстаўляць звесткі ў электроннай форме", - сказала Святлана Яськова.

Штогод МПЗ сумесна з Мінфінам праводзяць інвентарызацыю падатковых ільгот, вывучаюць, якія з іх малаэфектыўныя або не запатрабаваны. "З 2025 года прадугледжваецца выключэнне льготы па падатку на дабаўленую вартасць пры ўвозе сыравіны для вытворчасці мастацкіх вырабаў, сартавога посуду, вырабаў са шкла і хрусталю. Гэта незапатрабаваная льгота, якая ў нас не мае актуальнасці", - адзначыла намеснік міністра.

Пры гэтым плануецца прадоўжыць ільготу па падатку на прыбытак для арганізацый, якія выкарыстоўваюць працу інвалідаў (адносна прыбытку, атрыманага такімі арганізацыямі ад здачы ў арэнду або лізінг маёмасці). Адносна грамадскіх аб'яднанняў інвалідаў, іх унітарных прадпрыемстваў і ўстаноў падаўжаецца льгота па зямельным падатку і арэнднай плаце за зямельныя ўчасткі, якія знаходзяцца ў дзяржуласнасці.

Святлана Яськова таксама нагадала, што ў бягучым годзе заканчвае сваё дзеянне ўказ нумар 80 ад 28 сакавіка 2023 года. Ён рэгуляваў парадак падаткаабкладання аперацый з лічбавымі знакамі (токенамі). "Каб захаваць гэтыя прэферэнцыі, палажэнні ўказа пераносяцца ў Падатковы кодэкс. Глабальных навацый няма. Проста ў Падатковым кодэксе будуць замацаваны палажэнні па аперацыях з токенамі. Плацельшчыкам, якія ажыццяўляюць такія аперацыі, як і раней, нельга будзе прымяняць спрошчаную сістэму падаткаабкладання (ССП) і нельга будзе прымяняць адзіны падатак для вытворцаў сельскагаспадарчай прадукцыі. Таму што і так гэтыя рэжымы прадугледжваюць даволі нізкія стаўкі падаткаў у параўнанні з іншымі суб'ектамі гаспадарання", - звярнула ўвагу яна.

Намеснік міністра расказала пра навацыі адносна спрошчанай сістэмы падаткаабкладання. "Цяпер разглядаецца пытанне аб павелічэнні крытэрыю выручкі для прымянення ССП. Пакуль гэта пытанне адкрыта, - адзначыла яна. - Пры гэтым шэраг пытанняў, звязаных з кантрольнай дзейнасцю, ужо знайшоў сваё адлюстраванне ў Падатковым кодэксе. Адзін з прыкладаў - абмежаванне на прымяненне спрошчанай сістэмы падаткаабкладання для арганізацый, створаных у працэсе рэарганізацыі. Напрыклад, калі арганізацыя, што прымяняла ССП, перавысіла крытэрый, а затым у мэтах захавання такой магчымасці рэарганізавалася, і наваствораныя арганізацыі спрабуюць зноў прыняць ССП, - такая сітуацыя не дапускаецца. Такім наваствораным арганізацыям будзе забарона на прымяненне ССП".

Усе навіны