Рыжанкоў: Беларусь - самы гарачы прыхільнік АДКБ

Беларусь - самы гарачы прыхільнік АДКБ. Аб гэтым заявіў журналістам міністр замежных спраў Беларусі Максім Рыжанкоў напярэдадні саміту АДКБ на ўзроўні кіраўнікоў дзяржаў, перадае карэспандэнт БЕЛТА.

Кіраўнік беларускага знешнепалітычнага ведамства чакае ад маючага адбыцца саміту далейшага ўмацавання інстытуцыянальных асноў АДКБ.

"Мы ідзём у нагу з часам, і арганізацыя развіваецца ў духу часу. Беларусь - самы гарачы прыхільнік гэтай арганізацыі. Мы падтрымаем усе рашэнні, якія будуць выносіцца на абмеркаванне, падпісанне", - падкрэсліў Максім Рыжанкоў.

Паводле яго слоў, у час такіх мерапрыемстваў абмяркоўваюцца важнейшыя пытанні, якія стаяць на парадку дня. На гэты раз разам з рашэннямі, якія будуць прымацца з мэтай узмацнення і каардынацыі дзеянняў сіл аператыўнага рэагавання, іх тылавога забеспячэння, на парадку дня таксама дакументы, накіраваныя на захаванне гістарычнай памяці. У прыватнасці, гэта датычыцца святкавання 80-годдзя Перамогі ў Вялікай Айчыннай вайне.

Таксама будуць адпрацоўвацца пытанні большага міжнароднага пазіцыянавання АДКБ, спалучэння дзейнасці Арганізацыі з іншымі міжнароднымі аб'яднаннямі, якія таксама займаюцца пытаннямі міжнароднай бяспекі.

Чакаюцца таксама рашэнні кадравага, бюджэтнага характару, накіравання сродкаў на розную праектную дзейнасць.

"Многія падзеі, якія прайшлі ў рэгіёне АДКБ, вымусілі нас паглядзець на нашу каардынацыю дзеянняў крыху па-іншаму. Якраз шэраг рашэнняў будзе садзейнічаць узмацненню каардынацый дзеянняў адпаведных службаў", - заявіў Максім Рыжанкоў.

Чакаецца прыняцце сумеснай праграмы па ўмацаванні таджыкска-афганскай граніцы. "Таксама вельмі важная тэма. Хоць гэта ад Беларусі нібыта далёка, але гэта закранае інтарэсы нашых бліжэйшых партнёраў. І, вядома ж, мы не аддзяляем тут сваю бяспеку ад іх бяспекі. Таму таксама будзем гэтыя рашэнні падтрымліваць", - падкрэсліў міністр.

"Будзе прымацца яшчэ і сумесная заява кіраўнікоў дзяржаў палітычнага характару. Зразумела, што кіраўнікі дзяржаў абмяняюцца думкамі па бягучым парадку дня. І я ўпэўнены, што гэты абмен думкамі выйдзе значна далей, чым вывучэнне абстаноўкі ў нейкіх асобных рэгіёнах. Гэта будзе ў цэлым прысвечана міжнароднай абстаноўцы, закрананню гарачых кропак на нашай планеце - тое, што хвалюе ўсіх нашых партнёраў і што на самай справе можа аказаць непасрэдны ўплыў на развіццё нашых дзяржаў", - дадаў Максім Рыжанкоў.

Як паведамлялася БЕЛТА, у Астану з рабочым візітам ужо прыбыў Прэзідэнт Беларусі Аляксандр Лукашэнка. 28 лістапада ён прыме ўдзел у пасяджэнні Савета калектыўнай бяспекі АДКБ. Лідары краін абмяняюцца думкамі аб міжнароднай і рэгіянальнай сітуацыі, яе ўплыве на бяспеку дзяржаў - членаў АДКБ, абмяркуюць вынікі супрацоўніцтва і перспектывы далейшага развіцця сістэмы калектыўнай бяспекі.

Усе навіны