Рыжанкоў расказаў, у чым заключаецца стратэгічнае партнёрства і братэрства паміж Беларуссю і Расіяй

Міністр замежных спраў Беларусі Максім Рыжанкоў на двухбаковай сустрэчы з расійскім калегам Сяргеем Лаўровым у Брэсце адзначыў вельмі высокі ўзровень міжведамаснага ўзаемадзеяння, перадае карэспандэнт БЕЛТА.

У Брэсце 22 лістапада прайшло сумеснае пасяджэнне калегій МЗС Беларусі і Расіі. Але спачатку кіраўнікі знешнепалітычных ведамстваў наведалі Брэсцкую крэпасць і сустрэліся са студэнтамі брэсцкіх універсітэтаў. Паводле слоў Максіма Рыжанкова, такі фармат мерапрыемства сведчыць аб сумеснай пазіцыі Беларусі і Расіі па захаванні гістарычнай памяці і процідзеянні спробам перапісаць гісторыю.

"Узаемадзеянне паміж знешнепалітычнымі ведамствамі ў нас на вельмі высокім узроўні. Цэлы комплекс мерапрыемстваў на працягу года праходзіць. Заўсёды адчуваю падтрымку з боку Міністэрства замежных спраў і асабіста вашу падтрымку. Гэта дае магчымасць аператыўна вырашаць любыя пытанні. Нават калі мы знаходзімся далёка адзін ад аднаго, у нас заўсёды ёсць рабочы кантакт", - падкрэсліў кіраўнік беларускага МЗС.

Максім Рыжанкоў падзякаваў усім супрацоўнікам расійскага міністэрства, якія працуюць за мяжой. "Гэта сапраўды вялікая падмога ў рэалізацыі тых знешнепалітычных, знешнеэканамічных задач, якімі мы займаемся. Ды і ў цэлым дзяліць нам за мяжой няма чаго. Мы ўзаемна дапаўняем адзін аднаго, дапамагаем. У гэтым, напэўна, і ёсць тое стратэгічнае партнёрства, братэрства паміж нашымі краінамі", - сказаў ён.

Сяргей Лаўроў у сваю чаргу адзначыў, што задачы, якія ставяць перад знешнепалітычнымі ведамствамі прэзідэнты, прадугледжваюць самае цеснае ўзаемадзеянне на ўсіх узроўнях, у тым ліку паміж кіраўнікамі рэгіёнаў і абласцей.

"Мы ведаем, якую ўвагу Аляксандр Рыгоравіч Лукашэнка ўдзяляе рэгулярным сустрэчам з кіраўнікамі суб'ектаў Расійскай Федэрацыі. Разам з Уладзімірам Пуціным яны праводзяць спецыяльныя форумы. Гэта ўжо стала традыцыяй. І, вядома, Брэст - гэта сімвал, асабліва ў год 80-годдзя вызвалення Беларусі і напярэдадні 80-годдзя нашай агульнай Вялікай Перамогі. І вельмі прыемна, што была арганізавана сустрэча з моладдзю. Было відаць, як яны цікавяцца знешняй палітыкай. І было відаць, што яны жывуць літаральна сваімі вучэбнымі працэсамі, будаўнічымі атрадамі. Гэта дае чарговую гарантыю, што маладое пакаленне будзе дастойным пераемнікам справы, якой займаюцца нашы прэзідэнты і якой мы стараемся ўсяляк садзейнічаць", - заявіў міністр замежных спраў Расіі.

Сярод тэм сумеснай калегіі ў тым ліку планы па развіцці Саюзнай дзяржавы, якой вось-вось споўніцца 25 гадоў. "Я ўпэўнены, будуць новыя дамоўленасці на наступны перыяд, якія будуць яшчэ больш маштабнымі, у інтарэсах нашых краін, нашых народаў", - дадаў Сяргей Лаўроў.

Усе навіны