Сергяенка заклікаў дэпутатаў, кіраўніцтва рэгіёнаў ствараць усе ўмовы для росту дабрабыту людзей

Дэпутацкаму корпусу, кіраўніцтву рэгіёнаў трэба ствараць усе ўмовы для павышэння вытворчасці і ў канчатковым выніку дабрабыту жыхароў. Аб гэтым заявіў старшыня Палаты прадстаўнікоў Ігар Сергяенка на сустрэчы дэпутацыі Палаты прадстаўнікоў ад Гомельскай вобласці з кіраўніцтвам аблвыканкама, Гомельскага абласнога Савета дэпутатаў, перадае карэспандэнт БЕЛТА.

Ігар Сергяенка адзначыў, што перад сустрэчай дэпутаты наведалі мемарыяльны комплекс "Ала". Ён падкрэсліў, што дзякуючы такім мемарыялам, а таксама неабыякавым людзям захоўваецца памяць, гістарычная праўда аб падзеях Вялікай Айчыннай вайны. "А абараняць сёння гістарычную памяць, гістарычную праўду даводзіцца практычна на ўсіх пляцоўках", - звярнуў увагу старшыня Палаты прадстаўнікоў.

Дэпутаты таксама азнаёміліся з прамысловым патэнцыялам Светлагорска, пабываўшы ў ТАА "Амета-Электрод", ААТ "СветлагорскХімвалакно". Як звярнуў увагу Ігар Сергяенка, прадпрыемствы развіваюцца, даволі паспяхова вырашаюць самыя важныя задачы ў цяперашні няпросты час, ствараюць новыя віды прадукцыі, маюць планы, як рухацца далей. "Са свайго боку ўсім нам - дэпутацкаму корпусу, кіраўніцтву рэгіёна - неабходна ствараць усе ўмовы для павышэння ўзроўню вытворчасці і ў канчатковым выніку - для росту дабрабыту жыхароў", - зрабіў акцэнт старшыня Палаты прадстаўнікоў.

На сустрэчы ён абазначыў некалькі напрамкаў сумеснай работы ў вырашэнні пытанняў сацыяльна-эканамічнага развіцця вобласці. Па перакананні Ігара Сергяенкі, у рэгіёнах трэба больш эфектыўна выкарыстоўваць патэнцыял дэпутатаў, у тым ліку ў інфармацыйнай, растлумачальнай рабоце з насельніцтвам, у сустрэчах з калектывамі рознай формы ўласнасці. "Важна задзейнічаць рэсурс дэпутатаў у грамадска-палітычных акцыях", - падкрэсліў старшыня Палаты прадстаўнікоў. Яшчэ адзін напрамак для сумеснай работы - падтрымка і развіццё патрыятычных ініцыятыў грамадзян.

Асаблівы акцэнт быў зроблены на рабоце са зваротамі грамадзян. Як расказаў Ігар Сергяенка, колькасць зваротаў да дэпутатаў ад жыхароў Гомельскай вобласці павялічылася. У топе тэм - ЖКГ, транспарт, ахова здароўя, адукацыя, гандаль. "Але без раённага выканаўчага камітэта не заўсёды можна вырашыць тую ці іншую праблему. Неабходны толькі сумесныя дзеянні. Таму работу трэба весці разам. Галоўнае - не дапусціць росту напружанасці", - арыентаваў удзельнікаў сустрэчы старшыня Палаты прадстаўнікоў.

Як удакладніў старшыня Гомельскага аблвыканкама Іван Крупко, у Гомельскай вобласці дэпутаты Палаты прадстаўнікоў актыўна ўключаюцца ў абмеркаванне пытанняў рэгіёна, у тым ліку і на пасяджэннях аблвыканкама, у работу са зваротамі грамадзян. "Такое ўзаемадзеянне павінна і будзе толькі ўмацоўвацца", - дадаў кіраўнік рэгіёна.

На сустрэчы размова ішла і аб многіх іншых вектарах сумеснай работы.

Усе навіны