У Беларусі фарміруюць нацыянальны тэхнічны камітэт па стандартызацыі ў сферы ШІ

У Беларусі пачалі фарміраваць нацыянальны тэхнічны камітэт па стандартызацыі ў сферы штучнага інтэлекту, паведамляе БЕЛТА са спасылкай на Дзяржаўны камітэт па стандартызацыі.

"Сёння тэхналогіі штучнага інтэлекту пачынаюць актыўна ўкараняцца ў вытворчай і сацыяльнай сферах. Гэта робіць актуальнымі пытанні распрацоўкі стандартаў у гэтай галіне. Таму цяпер фарміруецца нацыянальная экспертная пляцоўка. Адпаведныя работы праводзіць Аб'яднаны інстытут праблем інфарматыкі Нацыянальнай акадэміі навук Беларусі (АІПІ НАН Беларусі), які вызначаны "офісам лічбавізацыі" НАН Беларусі", - расказалі ў ведамстве.

Тэхнічны камітэт будзе прадстаўляць аб'яднанне прадпрыемстваў і арганізацый, зацікаўленых у распрацоўцы стандартаў у сферы ШІ. Прапановы аб уключэнні ў яго склад трэба накіроўваць да 25 ліпеня ўключна ў АІПІ НАН Беларусі.

Сярод асноўных функцый камітэта будуць распрацоўка стандартаў, разгляд іх праектаў, у тым ліку міждзяржаўных і міжнародных, забеспячэнне інтарэсаў Беларусі пры ўзаемадзеянні з аналагічнымі міжнароднымі, рэгіянальнымі і нацыянальнымі тэхнічнымі камітэтамі іншых дзяржаў і інш.

БелТА