Версия для печати
Размер шрифта:
Фото
Печатать

Біяметрычныя пашпарты ўводзяцца ў Беларусі з 1 верасня. Навошта іх атрымліваць і колькі яны будуць каштаваць

04.08.2021
Прэзідэнт Беларусі Аляксандр Лукашэнка 16 сакавіка падпісаў указ №107 «Аб біяметрычных дакументах». Пра гэта БЕЛТА паведамілі ў прэс-службе кіраўніка дзяржавы.

У адпаведнасці з указам біяметрычныя дакументы ў краіне ўводзяцца з 1 верасня гэтага года. Іх выкарыстанне дазволіць аўтаматызаваць працэдуру ідэнтыфікацыі асобы, спрасціць праходжанне пашпартнага кантролю пры перасячэнні мяжы, будзе спрыяць развіццю электронных сэрвісаў.

У дакументы новага тыпу будзе ўбудавана мікрасхема, якая змяшчае фотавыяву, адбіткі пальцаў рук і іншыя персанальныя дадзеныя ўладальніка.

Усяго з'явіцца 8 новых відаў дакументаў, якія змяшчаюць біяметрычныя дадзеныя, у тым ліку ідэнтыфікацыйная карта грамадзяніна і біяметрычны пашпарт. За выдачу ідэнтыфікацыйнай карты спатрэбіцца заплаціць 1,5 базавай велічыні (1 БВ - Br29), біяметрычнага пашпарта - 2 БВ.

ID-карты плануецца выкарыстоўваць на тэрыторыі нашай краіны для пасведчання асобы ўладальніка. Біяметрычныя пашпарты спатрэбяцца для выезду за мяжу (калі грамадзянін не плануе такія паездкі, то атрымліваць гэты пашпарт не патрабуецца). Яго выраб магчымы толькі пры наяўнасці ў заяўніка ідэнтыфікацыйнай карты.

Таксама пашыраецца функцыянал дакументаў, якія сведчаць асобу. За кошт выкарыстання асабістага электроннага лічбавага подпісу ідэнтыфікацыйная карта дазволіць здзяйсняць юрыдычна значныя дзеянні ў электронным выглядзе.

Абавязковай замены наяўных у насельніцтва пашпартоў на новыя біяметрычныя дакументы не плануецца. Пашпарт грамадзяніна Рэспублікі Беларусь, які дзейнічае ў цяперашні час, будзе выдавацца на ранейшых умовах.

Грамадзяне самастойна будуць вырашаць, які вiд сведчачага асобу дакумента яны хочуць атрымаць (біяметрычныя дакументы або пашпарты дзеючага ўзору). Кошт афармлення дзеючых пашпартоў не зменіцца. Захоўваецца і магчымасць выезду за мяжу па гэтым дакуменце.

© ШУМІЛІНСКІ РАЁННЫ
ВЫКАНАЎЧЫ КАМІТЭТ, 2025.