Пілотны праект "Музыка лечыць", які не мае аналагаў у Беларусі, стартаваў у Віцебску
Праект распрацаваны ў рамках міжведамаснага ўзаемадзеяння Віцебскага абласнога клінічнага цэнтра медыцынскай рэабілітацыі і Віцебскай абласной філармоніі.
Першае мерапрыемства праекта пад назвай «Струнатэрапія» адбылося сёння ў актавай зале цэнтра медыцынскай рэабілітацыі.
Пацыентаў і гасцей мерапрыемства віталі намеснік начальніка Галоўнага ўпраўлення па ахове здароўя аблвыканкама Людміла Кавалёва і галоўны ўрач медустановы Уладзіслаў Мужычэнка.
Сваё мастацтва ігры на струнных інструментах прадставілі лаўрэаты міжнародных конкурсаў Сяргей Цімашэнка і Кацярына Мельнікава (цымбалы), Мікіта Курловіч (мандаліна), Марына Папкова (фартэпіяна), а таксама легендарны актэт балалаек «Віцебскія віртуозы». Сустрэчу правяла дырэктар Віцебскай абласной філармоніі Таццяна Савіцкая.
Жывое выкананне спецыяльна падабранага рэпертуару для пацыентаў неўралагічнага профілю, у тым ліку асоб, якія перанеслі вострае парушэнне мазгавога кровазвароту, па задуме арганізатараў павысіць якасць аказання рэабілітацыйнай дапамогі.
Усяго на працягу канцэртнага сезона будзе праведзена чатыры такія сустрэчы.
Фота Аляксея Вронскага.
