Экскурсіі з музыкай і блінамі арганізуюць у Беларусі ў Масленічны тыдзень, паведамілі БЕЛТА ў Рэспубліканскім саюзе турыстычных арганізацый.
З 24 лютага па 2 сакавіка ў розных музейных комплексах краіны будуць адзначаць Масленіцу - старажытнае славянскае свята праводзін зімы. Турфірмы ў гэты перыяд прапануюць маршруты з масленічнымі пачастункамі. Можна выбраць варыянт, які спадабаўся, і бліжэй пазнаёміцца з народнымі традыцыямі, разам спаліць чучала, пагуляць у гульні, павадзіць карагоды.
Аб мерапрыемствах, якія пройдуць у рэгіёнах, інфармуе і Нацыянальнае агенцтва па турызме, дзе размешчаны каляндар падзей на вясну. Раённыя ўстановы культуры, нацыянальныя паркі краіны, вядомыя турыстычныя аб'екты прадугледзелі тэматычныя праграмы.
Напрыклад, у Бярэзінскім запаведніку гулянні "Эге-ге! Масленіца!" будуць праходзіць да 9 сакавіка. Навінка гэтага года - катанне на паравозіку. Ён будзе курсіраваць ад музея прыроды да заапарка.
У нацыянальным парку "Белавежская пушча" адсвяткуюць Масленіцу 1 і 2 сакавіка. Гасцям абяцаюць шмат весялосці: музыку, танцы, гульні, конкурсы, фаер-шоу і народную дыскатэку.
Беларускі дзяржаўны музей народнай архітэктуры і побыту 1 сакавіка запрашае на свята "Масленіца-2025", а 2 сакавіка - на свята "Даравальная нядзеля".
У Гродзенскай вобласці гасцей запрашаюць паўдзельнічаць у фальклорным свяце "Улассе ў Луках", якое стала брэндам Карэліцкага раёна. У гэты дзень жыхары аграгарадка апранаюцца ў цыганоў, запрагаюць тройку коней і едуць катацца па вёсцы з песнямі і музыкай. У Гродне пройдзе фестываль "Гродзенскі РазГуляй" і інш.
Да спіса