Акцыя ДАІ "Як захаваць жыццё на дарогах?"

Супрацоўнікі дзяржаўтаінспекцыі РАУС Шумілінскага райвыканкама з 7 па 17 кастрычніка правялі прафілактычную акцыю "Захавай сабе жыццё" па папярэджанні дарожна-транспартных здарэнняў з удзелам пешаходаў, а таксама з мэтай папулярызацыі флікераў і святловяртальных камізэлек у цёмны час сутак. Супрацоўнікі ДАІ штодзённа праводзілі рэйды, адпрацоўкі нерэгулюемых пешаходных пераходаў, на якіх багата Шуміліна, участкаў дарог і вуліц, якія найбольш падвергнуты рызыцы наездаў на пешаходаў.

Як рэальна захаваць жыццё пешаходам, веласіпедыстам, возчыкам гужавых павозак, вадзіцелям і пасажырам – пра гэта інспектары дарожна-патрульнай службы вялі размову падчас акцыі. Дзеля гэтага трэба быць уважлівымі на дарогах, прышпільвацца рамянямі бяспекі, садзіцца за руль транспартнага сродку толькі з правамі адпаведнай катэгорыі і ўвогуле захоўваць правілы дарожнага руху, кажа начальнік ДАІ Мікалай Гаралевіч пасля чарговага рэйду, які быў праведзены на гэтым тыдні па маршруце Мішкавічы-Кардон. У Мішкавічах былі выяўлены тры вадзіцелі і адзін пасажыр, якія не былі прышпілены рамянямі бяспекі. Вадзіцелям пагражае штраф да 1 БВ, а пасажырам – да 3 БВ. Адзін вадзіцель (за Мішкавічамі) ехаў на легкавушцы, пры гэтым не меў правоў, за што рызыкуе заплаціць штраф да 20 БВ.

У рамках прафілактычнай акцыі супрацоўнікі ДАІ правялі мерапрыемства для дзяцей Кардонскай школы "Жыццё ў далоні". У гэтай навучальнай установе абсталяваны спецыяльны кабінет, дзе можна вывучаць правілы дарожнага руху. Для дзяцей былі падрыхтаваны конкурсы, загадкі, віктарыны, падчас правядзення якіх праверылі веды школьнікаў па правілах дарожнага руху. Дзеці і педагогі задавалі цікавячыя іх пытанні: па нашэнні флікераў, па перавозцы пасажыраў на матацыклах, па ваджэнні мапедаў. Напрыканцы мерапрыемства работнікі дзяржаўтаінспекцыі ўручылі ўсім дзецям флікеры, а для малодшых школьнікаў – дапаможнікі з наборам дарожных знакаў. Інспектары ДПС таксама пахвалілі мясцовых гаспадароў веласіпедаў – яны стаялі ля школы і былі абсталяваны катафотамі і люстэркамі па правілах.

Все новости